Fréttir

Fyrsti framhaldsskólinn til að hljóta Grænfánann

Grænfáninn dreginn að húni. Menntamálaráðherra, Þorgerður Katrín Gunnarsdóttir ásamt fulltrúm FÁ og Landverndar.

Fjölbrautarskólinn við Ármúla er fyrsti framhaldsskólinn sem hlýtur Grænfánann. Hann hefur tekið þátt í verkefninu frá því í mars 2005. Fjöldi nemenda er yfir 1000 og fjöldi kennara og starfsmanna er yfir 100. Þetta er því stærsti skólinn hér á landi sem hefur tekið þátt í verkefninu.

Frá því skólinn var skráður í Grænfánaverkefnið hefur mörgum þeirra markmiða sem skólinn setti sér verið náð, með flokkun sorps, notkun hreinsiefna hefur verið minnkuð til muna og ljósaperum hefur verið skipt út fyrir sparperur þegar skipta hefur þurft um perur. Einnig hefur verið komið upp vatnshana í sal hjá nemendum til að stuðla að aukinni vatnsdrykkju og um leið minni neyslu gosdrykkja/ávaxtasafa/kaffis. Þetta leiðir til betri heilsu og minna sorps vegna drykkjaríláta.

Fjölbrautaskólinn við Ármúla hefur sýnt fram á að nemendur og starfsfólk skólans hafa viðhaldið öflugu og markvissu starfi í þeim tilgangi að vernda umhverfið og hafa sett sér ný markmið til að stefna næstu tvö ár. Fjölbrautaskólinn við Ármúla verðskuldar því að flagga Grænfánanum og vonandi verður hann öðrum framhaldsskólim til fyrirmyndar.

Grænfáninn er umhverfismerki sem nýtur virðingar víða í Evrópu sem tákn um góða fræðslu og umhverfisstefnu í skólum. Fánann fá skólar í kjölfar þess að hafa leyst fjölþætt verkefni sem efla vitund nemenda, kennara og annarra starfsmanna skólans um umhverfismál. Verkefnin eru bæði til kennslu og til að bæta daglegan rekstur skóla. Þau efla þekkingu nemenda og skólafólks og styrkja grunn að því að tekin sé ábyrg afstaða og innleiddar raunhæfar aðgerðir í umhverfismálum skóla. Jafnframt sýnir reynslan í Evrópu að skólar sem taka þátt í verkefninu geta sparað talsvert í rekstri. Nú Fáninn er veittur til tveggja ára í senn. Nú eru 69 skólar í verkefninu Skólar á grænni grein og þar af hafa nú með FÁ 33 skólar fengið Grænfánann.

Að baki Grænfánanum stendur Sjálfseignarstofnun sem heitir Foundation for Environmental Education (FEE) og var stofnuð árið 1981. Landvernd á aðild að FEE og hefur umsjón með Grænfánanum á Íslandi. Verkefnið nýtur stuðnings bæði menntamálaráðuneytis og umhverfisráðuneytis. Þá styðja fyrirtækin Flugfélag Íslands og Alcoa Grænfánann.



Glaðbeittur hópur eftir að hafa dregið Grænfánann að húni. Sigrún Helgadóttir, verkefnisstjóri Grænfánans, Heiða Björk Sturludóttir, sem stjórnaði verkefninu í FÁ, Þorgerður K. Gunnarsdóttir, menntamálaráðherra og Bergur Sigurðsson, framkvæmdastjóri Landverndar. Fyrir aftan stendur Gísli Ragnarsson, skólastjóri FÁ .

Tögg

Vista sem PDF

Fréttabréf