Menntun til sjálfbærni - Hugmyndir og hjálpargögn

Stefnan sem unnið er eftir í Skólum á grænni grein kallast sjálfbærnimenntun eða menntun til sjálfbærni og eru Skólar á grænni grein stærsta innleiðingartæki þeirrar stefnu í heiminum í dag. Á þessari síðu má finna námsefni sem tengist verkefninu á einhvern hátt. Í Skólum á grænni grein á Íslandi leynist mikill mannauður og deilum við hugmyndum sem reynst hafa vel í skólum um allt land. 

 

Með menntun til sjálfbærni er stefnt að því að skapa samábyrgt samfélag þar sem allar ákvarðanir og gjörðir taka mið af umhverfi, efnahag og félagslegri sanngirni. Mikilvægt er að þroska hvern einstakling sem virkan borgara, meðvitaðan um gildi sín, viðhorf og tilfinningar gagnvart ofantöldum hlutum bæði heima fyrir og hnattrænt. Þetta á við alla menningarhópa í nútíð og framtíð.

Nemendur Grenivíkurskóla færðu bæjarbúum jólagjöf

Margrét  Hugadóttir    18.12.2017
Margrét Hugadóttir

Nemendur Grenivíkurskóla tóku sig til og saumuðu taupoka handa öllum íbúum bæjarfélagsins. Með þessu vilja nemendur og starfsfólk skólans hvetja íbúa til að nota fjölnotapoka og draga úr plastpokanotkun á aðventunni.

Verkefnið er unnið af öllum í skólanum og hefur víðtæk áhrif út í samfélagið. 

Grænfánaverkefni Landverndar Skólar á grænni grein byggir á sjö skrefum sem skólar þurfa að stíga til að fá að flagga grænum fána. Verkefni Grenivíkurskóla fellur vel að sjötta skrefi verkefnisins; Að upplýsa og fá aðra með. Skólar eru hvattir til að tengjast og vinna með öðrum í nærsamfélaginu, s.s. íbúum, fyrirtækjum og stofnunum. Alls kyns opnar sýningar á verkum nemenda í nærsamfélaginu og kynningar í skólanum eða í fjölmiðlum upplýsa samfélagið um framgang verkefnisins. Það má því segja að jólaverkefni Grenivíkurskóla falli vel að þessum hluta verkefnisins. 
Til hamingju Grenivíkurskóli og Grenivík!

Hér má sjá frétt á RÚV um verkefnið. 

 

Tögg
Grenivikurskoli.jpg 

Vista sem PDF